Imejl tan-Negozju li ġiet kompromessa (Business Email Compromise)

F’każ ieħor irrapurtat lill-Pulizija ta’ Malta, Adrian, Chief Financial Officer ta’ kumpanija Maltija nvoluta f’attivitajiet ta’ kummerċ, safà vittma ta’ skema ta’ Business Email Compromise li kienet tinvolvi trasferiment ta’ €150,000.

Dan l-inċident beda meta Adrian għamel arranġament għal pagament lil sieħeb fin-negozju bħala parti minn operazzjonijiet finanzjarji ta’ rutina. Ftit wara li beda dan it-trasferiment, hu rċieva imejl mingħand dak li deher l-imejl leġittimu tas-sieħeb tiegħu. F’dan il-messaġġ, hu ngħata struzzjonijiet sabiex iħassar il-pagament oriġinali u jidderieġi mill-ġdid il-fondi lejn kont bankarju differenti fir-Renju Unit, minħabba allegati tibdiliet amministrattivi.

Adrian, b’attenzjoni rreveda l-indirizz elettroniku minn fejn kienet intbagħtet din l-istess imejl u ma sab l-ebda diskrepanza li kienet viżibbli. Minħabba li l-indirizz elettroniku qabel mal-informazzjoni li hu kellu, hu kkonforma mat-talba li saritlu, u trasferixxa l-€150,000 lejn il-kont bankarju ġdid li kien ingħatalu. Kien biss wara li kkonferma t-tranżazzjoni bit-telefon, li s-sieħeb tiegħu esprima allarm, u stqarr li ma kienet intalbet l-ebda bidla bħal din.

Aktar investigazzjonijiet żvelaw kif il-kont tal-imejl tas-sieħeb fin-negozju kien ġie kompromess. Inħolqot regola malizzjuża fil-mailbox, fejn, b’mod awtomatiku, kienet tiddevja jew timmarka bħala “moqri” ċertu komunikazzjonijiet, u b’hekk tipprevjeni lid-detentur leġittimu tal-kont milli jinnota l-korrispondenza frawdolenti.

Il-frodisti mhux neċessarjament għadhom joħolqu indirizzi tal-imejl foloz; minflok, huma jistgħu anke jinfiltraw kontijiet ġenwini, fejn jagħmlu l-iskoperta tal-aġir qarrieqi tagħhom estremament diffiċli. Għalhekk huwa importanti li, meta kumpanija tirċievi xi talbiet għal bidliet fid-dettalji tal-kontijiet bankarji, il-kumpanija jew l-individwu għandhom jivverifikaw dawn l-istess dettalji permezz ta’ kanali ta’ komunikazzjoni indipendenti, bħal pereżempju, telefonata diretta lejn numri li jkunu ġew stabbiliti minn qabel.

Dikjarazzjoni: Dan il-kontenut huwa bbażat fuq każ reali investigat mill-awtoritajiet. Filwaqt li l-avvenimenti u ċ-ċifri deskritti huma fattwali, l-ismijiet inbidlu biex tiġi protetta l-privatezza tal-individwi involuti.

Il-Pulizija ta’ Malta investigat każ ta’ imejl tan-negozju li ġiet kompromessa (business email compromise) wara li rċeviet rapport mingħand Nicholas, senior executive f’kumpanija Maltija li topera madwar id-dinja kollha fis-settur tal-edukazzjoni. Fiż-żmien li ġara l-każ, din il-kumpanija Maltija kienet qed tmexxi xogħol ta’ rinnovazzjoni f’post ġdid barra minn Malta.

Waqt diskussjonijiet li kienu għaddejjin mal-kuntrattur responsabbli mir-rinnovazzjoni, dan tal-aħħar ħareġ fattura (invoice) flimkien mad-dettalji tal-kont bankarju fejn kellu jsir il-pagament. Bħala parti minn proċeduri interni tipiċi, il-kumpanija Maltija għamlet tentattiv sabiex tiċċekkja dawn id-dettalji bankarji qabel tipproċedi. Irċevew imejl ta’ konferma mingħand dak li deher l-imejl veru tal-kuntrattur, fejn kien qed jawtorizza l-pagament.

Fuq din l-informazzjoni, l-kumpanija Maltija trasferiet madwar €75,000 mill-kont bankarju tagħha. Ftit wara li sar dan it-trasferiment, il-kuntrattur informa lill-kumpanija Maltija li ma kienx irċieva l-pagament. Meta ġara dan kollu, u minħabba li dan ma kienx mistenni, saret investigazzjoni interna fejn ġie skopert li ċiberkriminali ħatfu l-indirizz tal-imejl tal-kuntrattur u li għalhekk ifisser li l-imejl tal-kuntrattur kienet ġiet kompromessa.

Il-frodisti kienu aċċessaw is-sistema tal-imejls tal-kuntrattur, segwew il-korrispondenza, u interċettaw l-informazzjoni tal-fattura. Huma biddlu d-dettalji bankarji tal-kuntrattur għal oħrajn foloz filwaqt li żammew l-istess indirizz elettroniku. Riżultat ta’ dan, il-kumpanija Maltija, mingħajr ma trid, bagħtet il-flus lejn kont bankarju kkontrollat mill-kriminali.

Kif seta’ dan jigi evitat?

Dan it-tip ta’ inċident seta’ ġie evitat permezz ta’ verifika ndipendenti tal-istruzzjonijiet dwar il-pagamenti ma’ xi persuna jew entità li tista’ tiġi fdata. Dawn huma xi ftit eżempji:

• Biex tikkonferma d-dettalji tal-kont bankarju ċċempel lill-kuntrattur dirett billi tuża numru tat-telefon magħruf (mhux wieħed ipprovdut fl-imejl suspettuża).
• Titlob konferma permezz ta’ mezz ta’ komunikazzjoni sigur sekondarju u stabbilit minn qabel, bħal indirizz tal-imejl ivverifikat qabel jew sit elettroniku sigur.
• Jiġi mplimentat xi proċess ta’ kontroll doppju fejn bidliet fid-dettalji bankarji tal-fornitur jeħtieġu konferma verbali minn żewġ persuni awtorizzati.
• Toqgħod attent għal bidliet mhux mistennija fl-istruzzjonijiet u destinazzjoni tal-ħlas, li huma sinjal ta’ twissija komuni fl-attakki fejn l-imejl tan-negozju tkun ġiet kompromessa.

Dikjarazzjoni: Dan il-kontenut huwa bbażat fuq każ reali investigat mill-awtoritajiet. Filwaqt li l-avvenimenti u ċ-ċifri deskritti huma fattwali, l-ismijiet inbidlu biex tiġi protetta l-privatezza tal-individwi involuti.