Smishing u Spoofing

Dan il-każ jinvolvi scam li seħħet fis-sena 2023. Il-vittma, Josephine, rċeviet messaġġ frawdolenti fuq it-telefon ċellulari tagħha, liema messaġġ ġie mibgħut mill-istess numru li hi normalment tirċievi l-messaġġi mill-bank tagħha. Dan il-messaġġ frawdolenti kien jgħid hekk: ‘we are about to impose a hold on your account and remove your device, to avoid this pass security here at https://…..’ .

Minħabba li Josephine, li kienet fuq vaganza barra minn Malta, ħasbet li dan il-messaġġ mibgħut mill-Bank tagħha kien ġenwin, hi għafset fuq il-ħolqa (link) inkluża fl-SMS li hi rċeviet. Din il-ħolqa (link) wasslitha għal sit portali li l-format tiegħu kien kważi identiku għal dak tal-Bank, fejn hi imbagħad ġiet mitluba sabiex iddaħħal il-kredenzjali tagħha u tikkonferma xi informazzjoni personali. Il-vittma ħasbet li dan kien xi proċess ta’ verifikazzjoni ta’ sigurtà ta’ rutina li kien relatat ma’ servizz ieħor li fl-istess perjodu, kienet f’kuntatt mal-Bank dwaru.

Bl-użu tal-kredenzjali (isem, numru tal-mowbajl, numru tal-kont, numru tal-ID, u l-username) li ġew miksuba b’mod frawdolenti, flimkien ma’ one-time password li ġiet użata għar-reġistrazzjoni tal-apparat elettroniku ġdid, il-frodisti għamlu sensiela ta’ pagamenti lil terzi persuni mill-kont tal-vittma, u dan mingħajr involviment ieħor min-naħa tagħha. Il-vittma tilfet is-somma ta’ kważi €20,000.

Sinjali ta’ twissija li għandek iżżomm f’moħħok:

• SMS li jkun jinkludi ħolqa (link) li l-konsumatur jintalab jagħfas.
• Talba għall-iżvelar tal-kredenzjali u l-kodiċi tal-aċċess li huma sigrieti, u dan wara li tkun għafast il-ħolqa (link) inkluża fl-SMS.

Dikjarazzjoni: Dan il-kontenut huwa bbażat fuq każ reali investigat mill-awtoritajiet. Filwaqt li l-avvenimenti u ċ-ċifri deskritti huma fattwali, l-ismijiet inbidlu biex tiġi protetta l-privatezza tal-individwi involuti.

Dan il-każ jinvolvi scam li seħħet f’Lulju 2024. Il-vittma, li se nsejħulu John, rċieva SMS frawdolenti fuq il-mowbajl minn numru, li minn fuqu, is-soltu jirċievi messaġġi indirizzati lilu mingħand il-Bank.

Billi John ħass li dan il-messaġġ kien wieħed ġenwin mibgħut mill-Bank tiegħu, huwa għafas fuq il-link li kien hemm fl-SMS u żvela l-informazzjoni kunfidenzjali. Fil-proċess, huwa ta wkoll aċċess għall-kont tiegħu lil terzi persuni.

Ftit wara, John rċieva messaġġ fuq l-istess numru tal-SMS tal-Bank, fejn ġie mwissi li kienet ġiet mibdija transazzjoni ta’ verifika tal-kard tiegħu ma’ kumpanija barranija, u sabiex huwa jagħmel kuntatt mal-Bank peress li din il-verifika ma kinitx awtorizzata. Il-frodisti għamlu tentattiv ieħor sabiex jagħmlu pagament ieħor, iżda, John irnexxielu jagħmel kuntatt mal-Bank, f’ħin tajjeb, biex irnexxielu jiddiżattiva l-online banking tiegħu u jwaqqaf il-pagament.

Waqt it-telefonata tiegħu mar-rappreżentant tal-Bank, John ammetta li kien żvela l-kodiċi sigrieti tiegħu wara li għafas fuq il-link frawdolenti li kien irċieva fl-SMS. Huwa ġie infurmat sabiex iżur il-fergħa tal-bank biex jerġa’ jattiva l-online banking tiegħu.

Waqt it-telefonata tiegħu mar-rappreżentant tal-Bank, John ammetta li kien żvela l-kodiċi sigrieti tiegħu wara li għafas fuq il-link frawdolenti li kien irċieva fl-SMS. Huwa ġie infurmat sabiex iżur il-fergħa tal-bank biex jerġa’ jattiva l-online banking tiegħu.
Wara li John personalment żar il-fergħa tal-bank, irċieva telefonata mingħand xi ħadd, li pretenda li kien mill-bank, fejn infurmah li, għal raġunijiet ta’ sigurtà, l-USER ID (li kienet diġà ġiet mibdula meta żar il-fergħa), kellha bżonn tinbidel. Din it-telefonata ġiet segwita minn diversi telefonati oħrajn biex jikkonvinċuh jibda l-proċess sabiex jinbidel il-USER ID.

Billi ħaseb li kien qed ikellem lill-bank, John spiċċa pproċeda billi segwa l-istruzzjonijiet mogħtija lilu mill-frodisti sabiex jibdel il-USER ID tiegħu, fejn eventwalment, spiċċa tilef l-aċċess għall-online banking tiegħu.

Sinjali ta’ twissija li għandek iżżomm f’moħħok:

• SMS li jinkludi link li l-individwu jintalab biex jagħfas.
• Talba għall-iżvelar ta’ kodiċi ta’ aċċess sigrieti wara li tagħfas fuq il-link li tkun inkluża fl-SMS mibgħut.
• Telefonati persistenti u mhux mitluba sabiex jinbidel il-USER ID għall-aċċess tal-kont bankarju tiegħek.

Dikjarazzjoni: Dan il-kontenut huwa bbażat fuq każ reali investigat mill-awtoritajiet. Filwaqt li l-avvenimenti u ċ-ċifri deskritti huma fattwali, l-ismijiet inbidlu biex tiġi protetta l-privatezza tal-individwi involuti.