Scams li jinvolvu l-irkupru tal-flus

Ġiet imnedija investigazzjoni wara li resident Slimiż, li ser ikun qed jiġi riferut bħala Joseph, irraporta li kien safà vittma ta’ scam oħra magħrufa bħala ‘recovery room’ scam. Joseph kien diġà sofra telf sinifikanti ta’ €20,000 kawża ta’ scam romantika. Ftit ġimgħat wara dan il-kalvarju, hu rċieva imejl mingħand mara li allegat li kienet investigatriċi li taħdem għall-‘Europol’. Hi infurmatu li, il-kriminali responsabbli mit-telf sostnut, kienu ġew arrestati u li l-flus kienu fil-proċess li jiġu ritornati lill-vittmi identifikati.

Sabiex jiġi ffaċilitat ir-ritorn tal-flus tiegħu, Joseph ingħata struzzjoni biex iħallas is-somma ta’ €5,000 għal dak li ġie deskritt bħala ‘tariffa għal-legalizzazzjoni u l-ipproċessar’. Din l-imejl dehret li kienet waħda uffiċċjali, minħabba li kienet tinkludi numri ta’ referenza tal-każ, u dokument ieħor li kien jixbah ħafna lil dokument awtentiku tal-Qorti. Fil-ġimgħat li segwew, il-frodisti ntroduċew ostakli ġodda, fejn talbu €3,500 oħra għal ‘clearance tal-konverżjoni tal-munita’, u ppruvaw ukoll jitolbu €2,000 għal ‘ċertifikazzjoni kontra l-ħasil tal-flus’. Minħabba li l-ispejjeż baqgħu dejjem jiżdiedu, u dan mingħajr l-ebda sinjal tal-flus tiegħu, Joseph beda jissusspetta ħażin, waqqaf il-pagamenti u talab għal għajnuna uffiċċjali. Verifikazzjonijiet sussegwenti kkonfermaw li l-operazzjoni kienet kollha ffabrikata, bil-frodisti jimpersonifikaw l-infurzar tal-liġi internazzjonali sabiex jisfruttaw mix-xewqa tal-vittma li jirkupra t-telf sostnut.

Sinjali ta’ twissija li għandek iżżomm f’moħħok:

• Il-kuntatt inizjali jibda minn individwu li jallega li qed jirrappreżenta aġenziji nazzjonali tal-infurzar tal-liġi.
• Il-frodisti wegħdu garanzija ta’ irkupru totali tat-telf sostnut fi skemi frawdolenti preċedenti.
• Diversi talbiet għal pagamenti bil-quddiem isiru bl-iskuża ta’ xi tariffi legali jew amministrattivi.
• L-imejls jinkludu dokumenti li jkunu jidhru bħal dokumenti uffiċċjali maħruġa mill-Qorti jew bħal ċertifikati legali, u dan biex joħolqu sens falz ta’ awtorità.
• L-ispejjeż ikomplu jiżdiedu bi skużi ġodda u varji għalfejn il-flus li ġew irkuprati għadhom ma ġewx rilaxxati.

Dikjarazzjoni: Dan il-kontenut huwa bbażat fuq każ reali investigat mill-awtoritajiet. Filwaqt li l-avvenimenti u ċ-ċifri deskritti huma fattwali, l-ismijiet inbidlu biex tiġi protetta l-privatezza tal-individwi involuti.

F’Marzu 2024, Daniela ressqet rapport lill-Pulizija ta’ Malta, wara li din sfat vittma ta’ scam magħrufa bħala ‘recovery room’. Daniela kienet diġà ġarrbet telf sinifikanti ta’ €10,000 kawża ta’ scam preċedenti relatata ma’ investiment fil-kriptoassi. Kważi xahrejn wara dan it-telf inizjali, l-vittma kienet ġiet ikkuntattjata minn raġel, li preżenta lilu nnifsu bħala ‘James’, u li allega li kien qed jirrappreżenta aġenzija ta’ irkupru finanzjarju internazzjonali. James informa lil Daniela li l-flus li kienu nsterqulha kienu ġew traċċati u li kienu qed jinżammu f’kont sigur jistennew biex jiġu rilaxxati lilha.

Sabiex l-offerta tidher leġittima, James anke provda dokumentazzjoni li fuqhom deher evidenti l-logo tal-Awtorità għas-Servizzi Finanzjarji ta’ Malta (MFSA). Dawn id-dokumenti kienu jinkludu referenzi legali li kienu iżda ffabrikati, flimkien ma’ konfermi ta’ rkupru li kienu ddisinjati sabiex jevitaw ix-xettiċiżmu ta’ Daniela. James qalilha li, pagament ta’ €2,500 kien dovut minnha bil-quddiem, u dan sabiex tkopri xi spejjeż amministrattivi u legali qabel il-flus tagħha jistgħu jkunu rilaxxati. Peress li d-dokumenti mogħtija lilha kienu jidhru professjonali u anke minħabba li Daniela kienet qed tinagħta aġġornamenti kontinwi mingħand James fejn ġiet assigurata li ser tieħu flusha lura, Daniela trasferixxiet il-flus mitluba.

Ftit wara li għamlet l-ewwel pagament, Daniela ġiet ikkuntattjata minn individwu ieħor li allega li kien ‘compliance officer’. Hu qalilha li, qabel ma jiġi finalizzat l-irkupru, hi kienet mitluba titrasferixxi s-somma ta’ €1,800 oħra sabiex tkopri t-taxxi. Wara li Daniela għamlet dan it-tieni pagament, il-komunikazzjoni ma’ din l-aġenzija waqfet immedjatament. Kien hemm li hi ndunat li reġgħet sfat vittma ta’ scam għat-tieni darba, fejn tilfet €4,300 oħra b’żieda mat-telf sostnut mill-investiment oriġinali.

Sinjali ta’ twissija li għandek iżżomm f’moħħok:

• L-aġenzija ta’ irkupru tagħmel kuntatt miegħek, speċifikament wara li inti tkun diġà tlift il-flus kawża ta’ scam preċedenti.
• Ir-rappreżentant jallega li l-flus li inti tlift ġew intraċċati jew li qed jinżammu f’kont iffriżat.
• Il-frodisti jipprovdu dokumentazzjoni li tkun tidher li hi professjonali fejn dawn jużaw logos ta’ regolaturi bħal ma hi l-MFSA mingħajr awtorizzazzjoni.
• Qabel flusek ikunu jistgħu jiġu rilaxxati, jitolbuk tħallas tariffi amministrattivi jew legali bil-quddiem.
• Diversi individwi jiġu introdotti fil-konversazzjoni sabiex l-entità/l-aġenzija tiġi tidher bħala waħda professjonali.
• L-individwi involuti jwaqqfu kull kuntatt ġaladarba t-tariffi mitluba jiġu mħallsa.

Dikjarazzjoni: Dan il-kontenut huwa bbażat fuq każ reali investigat mill-awtoritajiet. Filwaqt li l-avvenimenti u ċ-ċifri deskritti huma fattwali, l-ismijiet inbidlu biex tiġi protetta l-privatezza tal-individwi involuti.