Każ reali ta’ Malti li se nsejħulu Paul juri kif frodi sofistikata tista’ tuża l-intelliġenza artifiċjali sabiex tqarraq lill-vittmi. Dan l-iscam beda meta Paul għafas link minn reklam fuq Facebook li kien jinkludi vidjows deepfake ta’ figuri lokali prominenti. Dawn il-vidjows u ritratti, maħluqa bl-użu tal-intelliġenza artifiċjali, kienu juru lil dawn il-persuni qishom qed jirrakkomandaw pjattaforma ta’ investment onlajn relatata ma’ kriptoassi. Paul, emmen li dawn ir-rakkomandazzjonijiet kienu ġenwini u wera interess f’investiment inizjali ta’ €260.
Ftit wara li pprovda d-dettalji tiegħu, Paul ġie kkuntattjat minn persuna li ppretendiet li hijakonsulent, li bdiet tikkomunika miegħu permezz ta’ telefonati u WhatsApp. Sabiex iżżomm l-interess tiegħu u tibni sens falz ta’ fiduċja, din il-persuna użat tekniċi ta’ manipulazzjoni biex toħloq relazzjoni ta’ ħbiberija. Il-konversazzjonijiet marru lil’hinn mill-investimenti u nkludew suġġetti personali bħal annimali domestiċi u possibbilta ta’ xiri ta’ proprjetà f’Malta. Meta ġie stabbilit livell għoli ta’ fiduċja, l-frodist mexa biex ikkonvinċa lil Paul iniżżel l-applikazzjoni “AnyDesk” fuq il-mobajl tiegħu. Din ippermettiet lill-kriminali jieħdu kontroll remot sħiħ tal-apparat tiegħu, fejn l-frodisti installaw programmi oħra u kisbu aċċess dirett għad-dettalji bankarji tiegħu.
Taħt l-iskużabiex jingħata servizz ta’ trading professjonali, l-frodisti mmanipulaw il-fondi ta’ Paul f’diversi pjattaformi ta’ servizzi finanzjarji diġitali. Huma saħansitra iggwidawh x’għandu jgħid lill-bank tiegħu meta jkun mistoqsi dwar dawn it-trasferimenti, sabiex il-pagamenti ma jiġux imblukkati. Hekk kif l-iscam kompla, Paul ġie mħeġġeġ jieħu self u jissellef flus mingħand familjari tiegħu biex iżid l-investiment. Fl-aħħar stadju tal-frodi, l-frodisti talbuh pagamenti urġenti u sostanzjali għall-hekk imsejħa “taxxi bil-quddiem”, bl-iskuża li dawn kienu meħtieġa sabiex jinħelsu l-profitti tiegħu. Meta Paul induna li kien vittma ta’ frodi, kien diġà tilef aktar minn €60,000.
Sinjali ta’ twissija li għandek iżżomm f’moħħok:
- Reklami fuq il-midja soċjali li jużaw intelliġenza artifiċjali u deepfake biex juru nies prominenti jirrakkomandaw investimenti.
- Kuntatt inizjali li jibda permezz ta’ link fuq il-midja soċjali.
- Il-persuna li tipprovdi gwida finanzjarja mhijiex liċenzjata.
- Ebda laqgħat wiċċ imb’wiċċ – komunikazzjoni biss permezz ta’ apps u mezzi diġitali.
- Talba biex tniżżel programm bħal “AnyDesk” biex jinagħta aċċess remot.
- Talbiet frekwenti biex tinvesti ammonti dejjem akbar.
- Indikazzjonijiet ta’ profitti għoljin u mhux realistiċi fi żmien qasir ħafna
- Talbiet urġenti għal pagamenti qabel ma tkun tista’ taċċessa l-flus tiegħek.
Dikjarazzjoni ta’ Ċaħda: Dan ir-rakkont huwa bbażat fuq każ reali investigat mill-awtoritajiet. Filwaqt li l-avvenimenti u ċ-ċifri deskritti huma fattwali, l-ismijiet inbidlu biex tiġi protetta l-privatezza tal-individwi involuti.
